Mia瞓身色誘震波男

模媽Mia（陳靜儀）昨日以超低胸裙拋出32C咪咪出席《爆衫猛男亞洲選拔大招募》活動，獲來自美國的猛男組合Chippendales成員Billy Jeffrey、David Abrams及Byran Chan托住出場，落力「瞓身」的她即「峰」湧而出，險些走光！席間Mia又為猛男度胸肌兼試手感，大摸David的「震波」，興奮的她即大呼：「冇試過咁嘅心跳！」同場的「香港大隻仔代表」Avis（陳偉成）、Dominic（何浩文）及King（趙勁皓），則獲美國猛男在台上示範爆衫，大騷「雞扒胸」和「朱古力」腹肌，三人尷尬推讓一輪後，一脫即獻醜，明顯香港「2D版」較美國「3D版」遜色得多！首次近距離接觸多位猛男的Mia興奮地說：「第一次試畀人抱出嚟、摸人震胸，好似心跳咁，我諗今晚都瞓唔着。（令你心動？）有呀！啱啱摸完震胸後，心跳都嚟埋！」

至於傷了十字韌帶、扶拐杖的Avis也認輸：「我都專登企埋一邊，費事比下去！（傷腳冇時間操Fit？）多咗時間，我呢兩日練咗單腳掌上壓。」他指腳傷後女友周秀娜有傳短訊呵番，對於娜姐被拍得與男人抱抱，他力撐娜姐指朋友食飯很正常。另外，昨日Mia疑外貌有變，她解釋可能因其頭髮染黑。