姚煒趙式芝相擁而哭

趙世曾女兒趙式芝（Gigi）與波爾錶太子女楊如芯（Sean）去年公開同性婚訊，愛得勇敢，可惜一直未獲父親及母親姚煒接受，夾在愛情與親情之間。昨日姚煒應邀出席反對訂立性傾向歧視條例活動，並擔任嘉賓上台分享，雖然活動與Gigi的信念背道而馳，但愛母深切的她依然親身到場支持，證明親情能超越一切。

姚煒、林以諾牧師和歌手周永恒等昨日出席由多個基督教團體假添馬公園舉行的《愛家共融祈禱音樂會》，以反對訂立性傾向歧視條例，身為基督徒的姚煒，以嘉賓身份上台分享女兒是同志的感受，但她全程未有公開Gigi及Sean的名字，她在五分鐘的演講中，情緒激動，說到心痛之處更一度哽咽：「當06年知道個女同個同性戀者一齊時，我好憤怒，曾經有撞頭埋牆嘅衝動，08年我去咗以色列旅行，受到神感動，學識包容，接受咗對方，覺得佢好孝順。不過幾個月前知道個女同對方安排結婚，我好心痛，我曾跪下向個女哭訴，叫佢畀預備同空間我，唔好太大動作。之後見到報道寫同志結婚阿媽祝福，我簡直心如刀割、痛哭失聲，生不如死，幾乎崩潰。其實我唔係好清楚個女內心世界，但依家知道點樣對個女好。」說畢，支持立法的Gigi竟然現身，並上台輕擁姚煒及面貼面，場面感人。

親情重於政治

其後Gigi接受電話訪問時，她強調支持立法，出席活動只為支持母親，她說：「我在場唔代表我立場，因為主辦單位邀請我媽咪分享，媽咪又想我去，我覺得母女感情比政治因素更緊要。」她稱自從她的同志婚訊見報後，姚煒曾有段時間不想見人，為人女兒的她說：「我想佢行出嚟，好過匿埋仲辛苦。我初時決定嚟唔嚟都好矛盾，因為同自己觀念有衝突，但最終母女愛最重要。」她揚言出席是次活動後更覺立法的迫切性。問到母女關係是否好轉？她說：「作為父母對同性戀實有掙扎。（媽媽仲係反對你婚事？）我唔代表佢答，等佢適當時出來講。」

Sean贊成立法

至於Sean表示知道Gigi出席今次活動時說：「我初時都反對，但佢今次去嘅目的係為阿媽，而唔係為反立法，我冇理由影響佢哋母女感情，但我絕對贊成立法。」

周永恒表示在現場見證姚煒在五千人中向Gigi說「對不起！」場面感動：「見到兩母女關係進步咗好多，冇話邊個對與錯，唔應該爭執而係多溝通。」至於宣布出櫃的何韻詩大讚兩母女勇敢：「父母認唔認同，係要溝通同了解。有偏激教會反覆講理論，令大家認為（同志）係件可怕嘅事。」