熱戀Ana R.首接花球 陳嘉容自動棄權

名模周汶錡（Kathy）與法籍老公Julien前晚舉行結婚派對，其中有拋花球環節，Kathy原本屬意拋給妹妹周麗淇或好友陳嘉容，但最後由Ana R.接到花球。最近與男友Brad熱戀的Ana表示是首度接到花球，她坦言大感意外：「我冇諗過會接到，我接到時全場反應好熱烈，大家都即刻望住Brad，搞到佢好尷尬！（你會今年內結婚？）我哋拍咗幾個月拖咋！唔會咁快。」

而陳嘉容笑言以往每逢婚禮都會積極搶花球，但無功而還，故前晚決定放棄：「其實當晚有人嗌我個名，但我冇企出嚟。Ana接到花球，我好戥佢開心，希望到佢結婚時，佢會拋個花球畀我。」