趙哲妤Cupcake冧仔

中國小姐趙哲妤原來是一名「麵包癡」，不但立志將來要開麵包店，更會自行炮製麵包和蛋糕滿足口腹之欲！她今次教大家炮製現時大熱的Cupcakes（杯子蛋糕），相當有板有眼！

趙哲妤（Uny）閒時最愛親自炮製麵包請朋友食，她說：「我由中學開始已經喺屋企嘗試整麵包同蛋糕，自己上網搵食譜自學。（整嘢食好有天分？）鍾意嗰樣嘢就自然會有，我請過好多中學同學食，仲會約埋佢哋一齊整，大家喺廚房玩。」Uny坦言曾為初戀男友花心思整甜品：「但唔係個個男友都食到我整嘅甜品！要覺得對方好重要先會整，所以我都算『入得廚房、出得廳堂』o架！」

焗到燶餵男友

她又大爆瘀事：「有次我焗麵包，但個焗爐本身壞壞哋，焗咗10分鐘之後我聞到有陣燶味，一打開個焗爐黑晒！同埋我整親畀男朋友食嗰啲都係失敗作品，所以好難忘。」

Uny今次就教大家炮製近年大熱的Cupcakes，雖然工序繁複，但Uny整得有板有眼，她說：「Cupcake分兩個部分，下面層係小蛋糕，上面層係Topping（奶霜），整完個蛋糕仔，再加番Cream狀嘅Topping就完成，最後步驟就係加啲食得而造型又好靚嘅裝飾品，咁就大功告成！」見Uny在製成品上分別加上水果、星星糖果、玫瑰花糖果及寫上「Uny」的巧克力塊等裝飾品，令Cupcakes的造型變得更可愛！

小店入貨平靚正

Cupcakes的製作過程看似簡單，其實準備工夫絕不馬虎，首先要準備大量材料，Uny教路：「材料喺普通蛋糕用品店買最平，料又最多，大型連鎖超市就會貴啲。」除此之外，Uny表示還可以因應不同喜好，選購不同形狀的糖果作為裝飾之用。

Amanda巴黎學整餅

除了Uny，混血索模Amanda S.同樣愛自製甜品蛋糕，為了興趣，她曾於2005年和2008年遠赴巴黎修讀甜品課程，後來更投資300萬元開設甜品店，並親自擔任廚師。醉心整餅的Amanda還曾在活動上請記者吃親手炮製的Cupcakes，非常Sweet！

Topping做法：

材料（6個分量）

牛油 200g

糖霜 400g（Icing Sugar）

不同味道食用色素 數滴

熱水 4茶匙

Step 1. 把室溫牛油打軟，一邊加糖霜，一邊打至糖完全混合成忌廉狀。

Step 2. 加入食用色素攪勻。

Step 3. 在Cupcakes上自行加上不同的食用裝飾品。

Step 4. 把放涼的Cupcakes放進雪櫃冷凍，口味更佳。

小蛋糕做法：

材料（6個分量）

牛油 110g

糖 50g

雞蛋 1隻

低筋麵粉 75g

泡打粉 1/2茶匙

雲呢拿油 數滴

Step 1. 將麵粉和糖倒入容器中，加入鮮奶、牛油和打至均勻的雞蛋，最後加入雲呢拿香油，用攪拌器把所有材料打約2-3分鐘。

Step 2. 將混合的材料放入紙杯模。

Step 3. 把6個小蛋糕放入一早預熱200度的焗爐內焗20分鐘。