鄭伊健娶YoYo拖字訣

鄭伊健曾承諾今年會與女友蒙嘉慧拉埋天窗，他昨日出席活動時再被司儀把戀情擺上枱，他笑言接受祝福但未夠喉，想趁機拖延婚事！

鄭伊健昨日出席海洋公園保育基金的活動，身為「星級海馬研究員」的他早前拍短片宣揚保育訊息，他希望更多人關注保育問題，並表示不贊成搬海灘，直斥香港的諮詢及報告草率兼「不覺眼」。問到可會叫女友蒙嘉慧（YoYo）一同擔任海馬研究員？他說：「佢水性唔強，曬太陽OK，游水就麻麻哋。」

他去年表示今年會迎娶拍拖多年的YoYo，其戀情昨日亦被擺上枱，司儀於台上表示海馬是少有的一夫一妻制海洋生物，祝伊健與另一半成雙成對，伊健沒回應，只笑個不停。受訪時提到被司儀祝福成雙成對，伊健表示會接受祝福，問到可感大壓力？他說：「都OK，依家成日有人祝福。（幾時結婚？）我嫌唔夠（祝福），拖長啲時間先！（準備晒啲嘢會公布？）我哋一向都神秘。」

冇睇新古惑仔

問到何時加盟新公司？伊健表示不清楚，因一切交給經理人林珊珊安排，又笑指對方信風水，可能要多看幾個風水師傅再決定。至於想以拍戲還是音樂作為加盟新公司頭炮？他說：「劉偉強（導演）都喺新公司，可能會再合作，又可能我自己搞有關製作嘅嘢。」曾於電影飾演蠱惑仔的他，表示沒看新片《古惑仔：江湖新秩序》。