林峯每集收50萬人仔冠絕TVB

林峯早前被指失落視帝扭計，無綫除了於《勁歌》總選頒發「最受歡迎男歌星」外，更為他以高價50萬人民幣1集接拍內地劇，最少穩袋1,500萬人民幣（約1,870萬港元），捧他成為無綫最高身價小生，希望他回心轉意！

林峯自於去年無綫台慶頒獎禮大熱倒灶，輸給三奪視帝的黎耀祥後，有指他決定完成兩年合約後，即返廈門協助父親打理家族生意，無綫獲悉後即諗計仔，希望他能回心轉意！日前無綫派出兩大巨頭區偉林及樂易玲，聯同英皇高層吳雨到排舞室，為綵排本月底個唱的阿峯打氣，期間區、吳還夾份800元「萬歲」，逗得現場人士歡呼聲連連！問到是否來安撫阿峯？區偉林例牌否認：「唔係，因為好想嚟睇吓阿峯！公司對每個員工都錫，我覺得阿峯跳舞非常唔錯，到時會去捧場！」

而今晚舉行的《勁歌》總選，無綫亦會頒發「最受歡迎男歌星」給阿峯，不但如此，據知無綫近日亦為他力爭內地大製作案子，以50萬人民幣1集身價接拍至少30集的古裝劇《陸小鳳》，比起視帝鄭嘉穎以35萬元人民幣1集接拍劇集《葉問》還要高，雖然最近傳出他以50萬元人民幣1集斟洽《葉問2》，不過還未成事，故阿峯暫成為無綫最高身價的小生！

一線女星拍住上

向來乃武俠小說粉絲的阿峯，曾接拍「三國」及「楊家將」等故事，故今趟《陸》劇於可觀片酬及角色人物利誘下，即使要黐鬚及連場打戲，阿峯亦毫無異議！而片商還會為阿峯找來內地一線女星配襯，幾大內地電視台亦早已預留年底黃金檔作播放，鑑於該劇於4月份才開工，故阿峯完成演唱會後，無綫先讓他放1個月悠長假期充電，對於無綫如此疼愛，續約事宜是否有得傾？阿峯說：「公司不嬲都好錫我，總之樂小姐去邊就去邊！（無綫幫你用50萬元1集拍內地劇？）真係唔知！只係知故事同角色，錢嘅嘢交畀經理人安排，咁呢個角色以前松哥（劉松仁）都做過，所以拍之前都會請教佢！」