朱咪咪開騷送燒味

朱咪咪忙於籌備下月舉行的紅館演唱會，早前又趕返新加坡為90歲的母親擺大壽，雖然自命是孝順女，但她笑言「麻雀枱上無母女」，與媽咪攻四方城時絕不鬆章：「最多打贏咗唔收佢錢啫！」

朱咪咪將於下月23及24日在紅館舉行《朱咪咪大吉利是演唱會2013》，不過開騷前還有另一要事要完成，她說：「就係幫我阿媽擺90歲大壽！為咗同阿媽慶祝，就算係聖誕搵錢嘅黃金檔期，我都推咗啲商演返新加坡陪阿媽。」問到有否送大禮，她笑說：「我阿媽最鍾意打麻雀，所以我同佢打咗4圈，不過絕對唔會鬆章，我好均真，最多贏咗唔收佢錢嘅啫！」

無懼甄妮搶客

咪咪媽年事已高，加上肺功能減退，要靠氧氣機幫助呼吸，由於要解決氧氣機的叉電問題，咪咪正考慮是否安排母親來港捧場，一切以母親的健康為大前提，不會太勉強老人家，她說：「我唔想阿媽太辛苦，舟車勞頓，如果媽咪真係嚟唔到，我咪寄片畀佢睇囉！」

同是「阿姐級」歌手的甄妮，將搶先於咪咪的演唱會前開騷，問咪咪會否擔心歌迷「揀妮棄咪」，她自信十足地表示不擔心，因雙方歌迷不同，更誇口說：「3歲至80歲都鍾意我，因為我形象健康，又拍廣告又拍劇！」此外，她透露屆時將「派錢」作撒手鐧，由於有贊助商支持，歌迷有機會贏得50元燒味現金券大利是，變相有免費飯食，咪咪哈哈笑說：「有叉燒、燒肉免費食，我呢啲又睇又食嘅騷，去邊度搵呀！」而出名「搞嘢」的金剛及咪咪在《巴不得媽媽……》中的兒子「蘇基」古明華將擔任嘉賓，向歌迷大放笑彈！