吳日言鄧芷茵結伴試婚紗

吳日言（Yan）與歌手鄧芷茵（June）日前孖公仔現身尖沙咀試婚紗，惹來Yan的結婚疑雲，不過事後Yan澄清「新娘不是我」，並踢爆June將下嫁圈外男友！

最近簽約香港電視旗下的Yan，日前以宅男熱愛的波點絲襪戰鬥格現身尖沙咀，身旁還有歌手June。二人「孖公仔」進入婚紗店選購婚紗，原本以為Yan預備與圈外男友結婚，竟發現試婚紗的是June！期間Yan猶如美指上身，不時指指點點，為June的婚紗造型提供意見，更落手落腳揀選不同婚紗。試完一大輪婚紗後，二人轉場改往選購新娘鞋，以作配襯婚紗。

事後Yan接受電話訪問時亦承認「新娘不是我」：「其實係June就嚟同男友結婚，所以我陪佢試婚紗！」她更坦言見到好姊妹試婚紗，令她也有結婚衝動：「我見到June着住婚紗嘅時候真係好感動，始終女仔見到婚紗都會憧憬將來自己結婚嘅畫面！」

本月拉埋天窗

June受訪時透露將於本月19日與拍拖5年的圈外男友在加拿大舉行婚禮：「加拿大係我哋成長嘅地方，所以我哋選擇喺加拿大舉行婚禮，不過就想低調，只會請喺加拿大嘅親戚朋友！」她還笑言男友沒有正式求婚，結婚只因他「衰多口」：「今年初我哋返多倫多探父母，媽咪問我哋都拍咗咁耐拖，幾時會結婚，男友就口快快話出年啦，就係咁我哋就開始籌備婚禮！」June坦言婚後會繼續發展歌唱事業，今年更計劃出碟。