呂晶晶名利雙收

呂晶晶年底與同經理人公司的黃嘉樂齊齊接拍內地劇，此劇剛於中央電視台播放，收視相當不俗，晶晶坦言多了很多賺錢機會，還大讚嘉樂腳頭好，希望可以再度合作。

呂晶晶去年十月與同經理人公司的黃嘉樂，齊以非常滿意的酬勞接拍內地劇《媽祖》，而此劇早前安排在中央電視台「開年大戲」的黃金檔期中播放，收視十分理想，平均有3.5點，最高更有4.7點，有約6,000萬觀眾收看。而早前晶晶與嘉樂返內地宣傳，反應亦相當不俗。

此劇已安排於農曆新年期間在四個地方的衞視播第二輪，晶晶說：「內地都多咗好多人搵我工作，亦有好多人搵我做訪問，亦因為呢套劇，微博都多咗好多人關注我。」豈不是多了很多賺錢機會？她說：「依家經理人公司都同我傾偈，不過自己接戲都穩陣啲，希望有多啲唔同嘅嘗試，入行八年，都拍咗好多部內地劇，終於有起色，內地巿場咁大，真係好開心，真係媽祖保佑。」

盼遇好劇本

晶晶早前接拍內地劇的酬勞已相當不俗，問她會否乘機加價時，她說：「今次呢套劇係第二女主角，又唔想突然間加價，除咗價錢，自己最想遇到好劇本。」此外，這部劇是黃嘉樂首部接拍的內地電視劇，晶晶說：「嘉樂真係好腳頭。」問她公司會否再安排二人再度合作，她說：「睇緣分可唔可以啦！我都好希望同佢一齊再合作，起碼大家有默契嘛！」至於農曆新年，晶晶表示會返杭州跟父母度歲。