偉仔唔介意被刪戲
王家衛電影《一代宗師》昨晚舉行首映，梁朝偉與張晉分別獲太太劉嘉玲及蔡少芬撐場，幸福滿瀉！而一度傳情變的章子怡，獲男友撒貝寧在微博暗撐，同樣笑得甜蜜！
千呼萬喚始出來的王家衛電影《一代宗師》昨晚在尖沙咀首映，主角梁朝偉、章子怡、張震及張晉等均有出席，而劉嘉玲與蔡少芬則悉心打扮做「跟得夫人」，其中大肚蔡少芬依然穿高踭鞋！剪完再剪後，《一》片長達130分鐘，非常「長戲」！
日前有傳嘉玲在江蘇花40萬元建佛寺及觀音像為偉仔保平安，偉仔說：「唔知，冇咁嘅事，可能以前嘉玲捐錢畀啲佛寺啩！冇問嘉玲，做善事隨心嘅。平時滑雪都可能整親，最緊要出入平安，有目的去做善事就唔係咁好。（報道話嘉玲種埋姻緣樹？）咁得意？唔知！」
撐王家衛公平
至於傳與王家衛不和被刪戲的宋慧喬昨晚雖沒到場，但卻拍下片段支持，偉仔對此說：「吓！點會呀！王家衛唔係咁嘅人，佢對每個演員都好公平。每個演員都拍咗好多，導演有權選擇，不和係冇可能，同王家衛合作咗咁多都冇聽過。（刪你戲會唔會可惜？）唔會，一定有原因，唔會失望。」
而張晉則表示未試過拍戲像王家衛般嚴格，文戲也隨時NG十多二十次，動作戲更不在話下！談及蔡少芬胎盤撕裂一事，他說：「冇事。（佢仲着高踭鞋﹖）佢唔怕嘅，跳都仲得，佢係咁活潑，成日好似拍動作片咁。」
至於傳與央視名嘴撒貝寧情變的章子怡昨晚本會受訪，但因大會安排混亂而取消；不過撒貝寧在微博上載《一》片海報隔空為女友打氣，似力證情未變！而另一大導張藝謀日前在內地低調捧《一》片場，散場後火速離開。
金句Hit爆網
拍攝多年的《一代宗師》，兩大必睇場口不容錯過！偉仔的雨中大戰剛柔並重；而章子怡亦打得入型入格！而片中亦不乏為網友津津樂道的金句：
「世間所有的相遇，都是久別的重逢。」
「我選擇留在我自己的歲月裏了。」
「想想，說人生無悔，都是賭氣的話。人生若無悔，那該多無趣啊！」
獲男友在微博暗撐的章子怡，佩戴De Beers Aura七卡逾百萬鑽石耳環亮相，非常養眼！
撒貝寧在微博宣傳《一代宗師》，曲線撐女友。
劉嘉玲盛裝陪老公偉仔亮相，夫唱婦隨。
王家衛、子怡與張震（右）碰杯慶祝。
蔡少芬腹大便便，依然陪張晉出席首映禮。