Celia K.擊情撩仔鬥

時下o靚模只懂騷事業線賣弄性感得個「睇」字，其實亦有不少睇得又「打」得。o靚模陳靜的師妹郭穎兒（Celia K.）本是運動健將，充滿運動細胞的她習拳數年，她笑言因自己男仔頭狂揮拳，嚇怕不少女學員，故自信爆棚想挑戰與男拳手打擂台！

打拳並非男士專利，要做女拳王亦不只局限於劇集或電影的橋段。近年打泰拳成了不少女士愛好的運動，既可喼弗亦有一技傍身。

o靚模Celia K.平日靠賣樣及晒事業線搵食，原來亦是打得之人，她已學打泰拳數年，起初因朋友想喼弗而拉埋她作伴一同報名上堂，Celia K.說︰「係女仔都想身形弗啲，本身係諗住陪朋友玩吓，講真，開頭興趣唔大，但上咗幾堂覺得幾好玩，打沙包可以幫自己放鬆心情添！」

想做性感打女

正所謂「唔打唔知自己咁打得」，時下女性個個都自稱男仔頭，Celia K.亦不例外，更自爆與其他女學員一起上堂時，自己是最打得的一個，令同學都怕要跟她對打，她說︰「我打起拳上嚟唔係人咁品，所以冇人肯同我打，哈哈，怕畀我打中面啩？」成了擂台鬼見愁的她，笑言已沒有女學員想跟她一同上堂︰「佢哋成日話好似同緊男仔一齊打拳咁，連教練都笑我，叫我唔好嚇走佢啲學生，不過我就唔覺囉！」Celia K.揚言想與男拳手比試，認真唔錫身︰「有諗過挑戰男仔，真係想試吓，咁當然唔好打面啦，哈哈！」

Celia K.坦言曾有做業餘拳手的念頭，但因工作忙碌，加上踩入模界及娛圈後要更加錫身，遂將「武功」應用於拍戲上︰「唔想浪費學咗嘅嘢，今年想繼續拍戲，而且我鍾意刺激，想做打女拍動作片。」問到會否做性感打女？她說︰「唔介意性感，一係做女特務，因為好多都係睇得又打得，啱晒我！」

去得「太盡」易傷身

做任何運動都應注重安全，進行拳擊這類劇烈運動，事前裝備要足，要有合身的拳套、拳褲等及保護裝備，如有需要可於關節綁上繃帶，減低打拳時受傷機會。打拳前做足熱身，以免肌肉抽筋或扭傷，同時需要有合資格教練在場，聽從教練指導，勿去得太盡令身體受傷，初學者切忌過度用力揮拳。進行劇烈訓練後應稍作休息及補充適量水分，免體力透支。最後，打拳大多為喼弗或減壓，別學得一技傍身後胡亂去「踢館」！