森美冇戀足愛影鬍鬚

森美及苟芸慧前晚出席飯局，森美承認患有遺傳性抑鬱症，但否認有戀足癖：「男人鬍鬚我都有影！」又大讚老婆有一對靚腳！至於高海寧被姦一集快將播出，苟芸慧大爆公司很多男同事想做白健恩！

藝人森美、苟芸慧（苟姑娘）、謝天華及陳煒等前晚出席電視劇《法網狙擊》的飯局。早前承認患上遺傳性抑鬱症的森美，透露病情在三年前已開始好轉，而非報道所指在三年前患病：「病都係因為工作壓力大啦！（有冇帶仔女檢查？）有！醫生話冇事。我都叫佢哋乖啲，因為爸爸搞笑，我驚老師都以為佢哋好搞鬼！」

樹大招風，森美除被揭患病，又被指有戀足癖，愛影女人腳，他說：「其實一千張相有六、七張，男人鬍鬚我都會影！（老婆呷醋？）冇！讀書嗰陣我都有影佢，佢對腳都好靚！」

謝天華戰中女

至於在《法》劇中，謝天華和苟芸慧的車震戲早前成為熱話，而高海寧（高Ling）的被姦戲同樣未播亦掀起話題，苟姑娘笑說：「公司好多同事都好羨慕白健恩，好多人問我嗰場高Ling有冇着衫，人人都想做白健恩！（咁你想唔想做高Ling？）可以嘗試，不過我驚我做唔到！」

天華明顯喝醉，飲到面紅紅，說話時又非常興奮，他說：「人人都話呢套劇我艷福不淺，所以監製特登安排個特約中女畀我，係演藝生涯最大挑戰！」