草蜢撐G.E.M.插叱咤

組合草蜢力撐鄧紫棋（G.E.M.）有言論自由，同時表示不抗拒出席頒獎禮，最緊要有獎！同場的大細孖周志文、周志康對一眾巨聲幫戰友能現身各大頒獎禮亦大呼羨慕！

組合草蜢、周志文和周志康日前一同出席商場活動，Fans逼爆整個商場，草蜢成員蔡一智和蘇志威玩遊戲時，從後擁抱兩名女粉絲，恨死台下觀眾！最近鄧紫棋（G.E.M.）連環暗寸叱咤頒獎禮欠公正，身為前輩的蔡一智發聲支持：「香港有言論自由，任何人都可以喺呢個平台發聲，講自己鍾意嘅嘢！（點睇依家嘅頒獎禮？）最緊要頒獎畀草蜢！」蔡一傑插嘴：「要認真頒認真做，你請我哋就會去！」

他們透露快將推出與軟硬合演的紅館騷DVD，蔡一智笑說：「諗住拎去參加康城電影節，我係第一男主角，女主角係葛民輝！」蔡一傑又展示「朱古力腹肌」：「我一直Keep住佢，希望開間朱古力店！」

周志文「留戀」馬賽

「巨聲幫」大孖周志文表示因劇集《名媛望族》吸納了新Fans：「要多謝馬賽同我飾演情侶，係好開心嘅一對！（同呢個緋聞女友熟咗好多？）成個劇組關係都好好，之前楊怡同馬國明攞獎都有請我哋食飯！」在旁的細孖周志康大呼羨慕，問到可想參與樂壇頒獎禮？他們說：「見到好多巨聲幫嘅朋友發光發熱，都戥佢哋開心，我哋都想喺同一個平台出現，不過機會未到！」