陳靜Sing呢撐師妹

女星陳靜（DaDa）去年在影壇發展順利，一直對唱歌甚有興趣的她最近踩過界，為師妹主演的新微劇獻唱主題曲，一於開金口「Sing援」師妹，她揚言想唱不停繼續為電影獻聲。

身材驕人的陳靜（DaDa）去年一洗o靚模形象，在影壇努力發展，獲台灣金馬獎最佳女配角提名的肯定，但原來她對唱歌一直甚有興趣，過往經常出埠獻唱，但多數唱別人的歌。早前其公司終於為她炮製個人歌曲《相信愛情》，令她大感興奮，月前已錄製好並隨其書附送光碟，但一直未有公開發表的機會。

最近DaDa知道師妹Celia K.（郭穎兒）、Iris（鍾采羲）、Monna（林宜芝）及MeiMei（曾善美）主演微劇《女生公寓》，即提議將其歌曲做主題曲，公司亦遂她心願。DaDa說：「我都好想同大家一齊拍劇，可惜檔期夾唔到，就當用呢首歌支持佢哋！我都有留意師妹嘅演出，好有潛質又夠放，希望遲啲喺大銀幕度比併吓演技！」

心郁郁恨嫁

早前DaDa穿上婚紗拍照以配合宣傳，加上歌詞講述對愛情的憧憬，令她心郁郁想結婚，她說：「都係想吓，最近接咗幾部戲，拍拖都冇時間。（首歌為你度身訂造？）歌詞入面有啲睇法都幾似我，不過好似更切合Celia K.劇入面嘅角色，佢由唔信愛情到相信愛情。」問到會否想繼續為電影唱主題曲或插曲？她說：「都想呀！最近再同導演彭浩翔、杜汶澤合作，一於向佢哋自薦吓先！」