林峯接手家族生意

今年未能奪得視帝的林峯，雖表示不會因而感失落，卻坦言終有一天會退出娛樂圈，幫父親打理生意。作為同事的陳豪鼓勵林峯明年再接再厲，別太快有退出心態，更笑言不敢接收他的粉絲。

林峯、組合Girls Kingdom和Super Girls等昨日出席活動，問到有關退出娛樂圈的傳聞，林峯說：「我之前受訪時都講過終有一日會返屋企幫爸爸手打理生意，因為我係長子，要盡呢個責任，但依家手頭上仲有工作，唔會係短期內嘅事。」

他表示可能因今年失落視帝，所以傳媒才把他退出一事扯在一起，但他強調不會因得不到視帝而失落。問到有傳他會攞尾彩獲頒勁歌男歌手獎？他說：「報道好有創作力，我一向對獎項唔係好渴求。」他又澄清並無推劇，對於有傳他不肯剃頭一事，他說：「自己有宣傳，要同廣告商交代，同埋經理人講咗可能唔使剃。」

至於被拍得到夜蒲及有金髮女埋身，他表示當晚只是跟同事和音樂團隊談演唱會事宜，金髮女只是朋友的朋友。而Girls Kingdom於台上載歌載舞時，Tube Dress不停滑落，要用手拉實，有隊員還不慎露出打底膠紙。

陳豪唔敢接收粉絲

另一邊廂，陳豪昨日出席另一活動時，問到有關林峯退出的傳聞？他笑說：「吓！又退出？咁佢啲粉絲點算呀？（接收佢啲粉絲？）我承受唔起喎！（傳佢推劇？）其實佢喺呢個圈好活躍，希望唔好咁快有退出心態，大把機會。（因失落視帝？）今年唔得咪出年，睇開啲啦！」而薛家燕於另一活動中大讚林峯既靚仔又能歌善舞，並不希望他退出：「視帝年年都有，今年可能會失望，但有實力同咁多人支持，只要遇到好劇本又出到位就得，唔使灰心。」