許廷鏗揮低大同拎No.1

歌手許廷鏗（Alfred）昨日和老闆何哲圖到黃埔一間唱片店宣傳新碟，獲女歌迷大讚靚仔及要求簽名。對於新碟成為銷量榜No.1，揮低同期出碟的方大同，Alfred坦言多謝歌迷支持：「都幾開心，因為年底都有唔少有實力歌手出碟，好似方大同、周杰倫，我可以做到一個禮拜冠軍真係要多謝歌迷買碟支持。」Alfred又透露將會出席所有頒獎禮，以報答傳媒的支持，又指就算古巨基缺席頒獎禮，巨聲幫出身的他在無綫頒獎禮都不會有特別優勢：「我唔覺得有優勢，如果我嘅歌曲值得攞就自然有獎，反而未Ready攞到獎項，好容易會喺網上聽到啲聲音。」而前晚和林欣彤出席頒獎禮的他力撐好友狀態大好，並透露她將會出席餘下的頒獎禮。