周秀娜罰Avis跪玻璃

周秀娜男友陳偉成（Avis）最近被指搭上o靚模Vivian，因有報道指他常自誇下體鑲珠，她昨日力撐男友有愛心，收留無家可歸的流浪者，但亦準備要對方跪玻璃以示懲罰，亦為男友澄清下體冇鑲珠！

周秀娜（Chrissie）昨日與師妹陳靜儀（Mia）、Annie G.、Hidy和Hailey C.等出席宣傳活動，以超短裙上陣的Chrissie，輕易撼低性感打扮的一眾師妹，成為焦點所在。

有指男友陳偉成（Avis）近日被拍到帶模Vivian返家過夜，Chrissie即主動為男友澄清，指對方向來有愛心，她說：「佢會收留無家可歸嘅流浪者，嗰晚係成大班朋友去，佢有同我講，但淨係影到兩個人，我信，不過佢都死梗！（罰佢跪玻璃？）咁上下啦！不過我要幫佢澄清，佢身體冇鑲珠！（你最清楚？）係囉！（生仔綁住Avis？）唔得閒，之後又要飛去北京做嘢，下半年都會喺內地多，所以之前都喺北京買咗間House，大約3、4百萬。」談到Avis喜愛約會異性，她可會約會男性報復？Chrissie笑說：「要啦！今晚我約咗師兄蕭敬騰，佢開演唱會，倒數嗰日我都會約好多男性朋友去玩，到我報復囉！」

Mia收追求者鑽戒

而戴上欖形鑽戒的Mia表示，此乃追求者送的聖誕禮物：「依家觀察緊，我都唔知佢送呢份咁有心思嘅禮物畀我！（你送咩回禮？）Cup Cake。（人哋介唔介意你性感？）佢知我工作性質應該唔會，如果對方唔鍾意，我會以事業為重。（你對小朋友有冇見過佢？）我唔會隨便帶小朋友見異性，等我哋相處吓了解咗先啦！」