猷君拖女友爆賭王好鍾意

賭王何鴻燊與四太梁安琪兒子何猷君於聖誕回港度假，雖然明年將考大學，但亦暫放下功課在佳節陪女友Francesca行街，可惜中途掛住講電話，備受冷落的Francesca大展迷魂箍冧猷君。猷君承認兩人感情穩定，賭王亦十分喜歡她這位靚女友。

最新一期《好報》獨家拍到何猷君與拍拖一年多的西班牙籍女友Francesca煙韌行街街，當日猷君穿波衫拖鞋，與女友逛中環，身為富家子完全沒有架子，還與女友到平民化時裝店揀衫，兩人有商有量，全情甜到爆。其後再戰其他店舖，期間猷君掛住玩電話，Francesca只好又翹又拖男友，猷君最後不敵女友冧功，放下電話專心陪女友行街。

閉關溫書考試

昨日記者致電猷君，他表示為考大學試，整個假期都閉關溫書，難得一日與女友行街，還大讚《好報》勁，他說：「你哋影到我已經好好彩，我要準備考試好少出街。（你着住波衫？）哈哈！我成日都着波衫。」被問到與女友感情是否很穩定，他直認不諱：「係！（聖誕節同女友點慶祝？）冇呀！要溫書，我都係同屋企人食餐飯，佢都要同屋企人過，咁佢都未夠18歲，大家要各自陪屋企人。」猷君謂雙方已見過家長，問到父親賭王是否很喜歡Francesca？猷君開心地說：「鍾意，佢唔會反對，呢個係我Choice（選擇）嘛！加上Daddy鍾意外國人。（覺得Francesca夠靚女？）哈哈！呢個係其中一個原因。」

生日唔恨收樓

另外，賭王在三房子女超蓮和猷啟18歲生日時，送了豪宅給他們作為成年生日禮物，下月將18歲的猷君，被問到爹哋是否送豪宅？他說：「我讀書讀到連生日都要人提，不嬲唔太重視呢樣嘢！亦唔會大搞，加上嗰段時間撞正考試。（爹哋出手闊綽？）爹哋如果送幾千萬樓畀我仲得人驚，唔好講笑，香港冇乜人生日會收層樓。（佢試過送樓畀超蓮？）家姐嘅嘢我就唔知啦！我直情冇同Daddy媽咪講過我想要乜。」曾被賭王稱讚是數學天才的猷君還乖巧地說：「我生日願望係考到間好大學，到時先再慶祝生日。」