基仔講明唔Like勁爆

古巨基曾多次缺席新城頒獎禮，今年又再度No Show！事先張揚有工作在身的他，在微博上載戲飛，似暗示得閒睇戲亦不去攞人人有份的「大獎」，更被踢爆早已對公司明言不喜歡新城頒獎禮！

逢到必有獎的《新城勁爆頒獎禮》前晚馬拉松式頒發163個獎，連「亞視之子」亢帥克亦有獎落袋，但身為天王級的古巨基卻捧蛋！基仔與新城的關係似乎愈搞愈大劑，雖然他事先張揚缺席四大頒獎禮，並以工作為由講明不會出席《勁爆》這個畀面派對，但他連落台階也不給新城，不但透過公司明言不喜歡新城頒獎禮，更於頒獎禮前夕在微博晒戲飛！

基仔前日下午上載的雖然是大前日（26日）的戲飛，但頒獎禮前一晚仍有閒情逸致睇戲，證明他甚為清閒，他更特地在頒獎禮舉行前才把戲飛放上微博，並寫道：「我特別去支持了兩個朋友仔（指蔡卓妍與鄭伊健）主演的電影。」又附上Chok樣黑超公仔，明剃新城眼眉！

頒獎禮要新意

不過，身為基仔勁敵的陳奕迅（Eason）卻力撐他No Show有理，Eason前晚在《勁爆》慶功宴上說：「其實上年大家都誤會我，佢（基仔）先係真（指缺席頒獎禮）。我啱啱旅行完返嚟，去咗（日本）食輻射麵！」他認為基仔缺席一定有他的意思：「英皇話要尊重佢意見，我作為朋友都會尊重。」問到公司是否不尊重他的意見，他笑說：「我係阿崩隻狗愈叫愈走，叫我唔去就會去，叫我去就未必去！」問到是否覺得少了競爭對手，他說：「一個啫！仲有好多對手！」

憑快歌《重口味》得獎的Eason，笑指頒獎禮愈少人就愈需要新搞作：「愈唔好玩就愈要搞新意，我以前未試過跳舞，但依家應攞跳唱歌手，唔應該頒畀小豬（羅志祥）！」談到「唔到冇獎」的新政策，他說：「要尊重制度，我喺TVB都試過，歌手好被動，有好成績就OK。我都好鍾意基仔隻《初初》同《無涯洞》，有好歌大家留意到就冇問題。」對於基仔被《叱咤》打壓的傳聞，Eason再度力撐：「應該唔關事！英皇已回應係傳聞！」

避談志偉被捕

此外，談及曾志偉早前被捕一事，Eason避忌地說：「唔提喇！仲提就Out，無聊！」並戲言雙眼有過濾器，會把不值看到的新聞過濾。對於好友梁漢文發聲明，他說：「依家興o架？我發完大家都發！總之唔好變當年慈善伶王連續劇！」

至於新城音樂、娛樂及製作總經理朱明銳，則踢爆基仔明言不喜歡《勁爆》：「若參加覺得唔舒服、唔想出席，咁仲有好多人出席！（基仔唔喜歡呢個頒獎禮？）係，佢一個月前已決定唔出席！」並強調會貫徹「唔到冇獎」的政策：「唔嚟Party冇理由拎禮物走，唔係針對你，基仔講咗唔參加，我哋都接受！」此外，雖然有指基仔被《叱咤》打壓，但他憑《戀無可戀》與Eason及羅力威等入選「叱咤我最喜愛歌曲」五強。