靚佬湯疑爆父女戀

六月離婚的50歲型男湯告魯斯（Tom Cruise）日前被雜誌指搭上「主動出擊」遞卡片的26歲餐廳經理Cynthia Jorge，二人更於紐約夜蒲狂歡，密密斟及大跳辣身舞，似乎靚佬湯有意轉戰圈外人再墮愛河！

早前與女星姬蒂賀姆絲（Katie Holmes）正式離婚的靚佬湯拍完電影《Oblivion》後便投入新片《All You Need Is Kill》工作，期間又抽空為自己監製的電影《烈探狙擊》（Jack Reacher）巡迴宣傳，雖然曾與片中拍檔傳緋聞，但多為「煲水新聞」，近日靚佬湯的發言人亦否認他與女星Malin Ackerman妹妹Jennifer的緋聞，令人質疑他以工作麻醉自己，無心展開戀情。

近日終有雜誌爆靚佬湯本月於紐約唐人街餐廳食飯時，獲靚女餐廳經理Cynthia主動遞上卡片，友人更形容他恍似被梳上髮髻和穿着緊身褲的Cynthia「催眠」一樣，翌日即致電對方，私下邀請比他年輕24年的Cynthia一起夜蒲。

施舞技冧新歡

據悉女方隔日在夜店進取示愛，二人又於舞池上大跳莎莎舞，舞藝出色的靚佬湯更冧到Cynthia不時甜笑。二人愈跳愈「埋」，儼如情侶般上演連場辣身舞，Cynthia更展開攻勢電暈靚佬湯。最後靚佬湯亦盡顯風度叫車送女方回家，似乎大有發展機會！