黃德斌窮到燶右耳失聰

擁有42吋胸肌的黃德斌，擔得、抬得、演得兼唱得，但原來他右耳早已失去七成聽力，幸而他從未自暴自棄！黃德斌主演的電視劇今年榮獲「最佳劇集」，但他仍然感到遺憾：「可惜媽咪睇唔到！」

入行逾廿年的黃德斌演繹無數角色，他主演的劇集《天與地》引起全城熱話，更憑全民公投勇奪「最佳劇集」。但德斌說：「媽咪睇唔到我做戲都係一個遺憾，我好想佢睇到我喺《天與地》嘅演出。佢本身係歌迷又係戲迷，以前成日喺屋企唱歌，佢好鍾意睇粵語殘片，但屋企冇電視，佢就成日唱歌。她臨走前幾年成日叫我去唱歌，叫我做歌手，但係我唔聽。之後我入咗藝訓班，成日做路人甲乙丙，佢冇點睇我做戲就過咗身。」

考獲潛水牌

他坦言有今日的成績全靠母親嚴厲管教：「細個媽咪對我家教好嚴，連學校旅行都唔畀我去，但如果唔係咁，我可能已經畀人斬死咗，因為以前屋企對面係公屋，有好多黑社會，如果唔係家教嚴，我可能已經跟咗大佬！」

德斌的人生亦如劇情般峰迴路轉，出身貧窮家庭的他右耳原來早已失去七成聽力：「我讀完書去做跟車工人，朝朝7、8點同同事游完水先返工，啲水入咗耳仔我又冇理，發炎、流膿先去睇政府醫生，嗰時屋企環境唔好冇錢睇私家，點知政府要排期成年半先有得睇。由最初普通發炎，去到日日瞓醒發現枕頭有血，最後阿媽捉我去睇急症，醫生一睇就即刻話我情況嚴重，幫我全身麻醉做手術，切除耳仔入面增生嘅肉，但右耳得番3成聽力。」但德斌從沒埋怨家貧，更從不介懷耳患：「我左耳仲好靈敏。（影響生活？）問題唔大，潛水都冇問題，我仲考到潛水牌！」