AOA大賣Sexy Voice

孖女組合AOA日前推出新碟，當中包含不同曲風，她們錄音時更被監製大讚聲線似Beyonce般性感！兩人由廣州來港發展，一直互相照顧，但訪問期間竟互數煮食技巧不濟！

孖女組合AOA日前推出新碟，她們表示花了一年時間籌備，當中以快歌為主：「喺入面我哋都試咗好多唔同嘅曲風，而且每首歌嘅唱法都唔同！」姊姊Annelle（大Ann）指最難演繹的歌曲是《我主場》：「因為首歌係第一首錄，好多嘢都未習慣，我仲要用一把好似老咗2、30年嘅聲去唱！淨係試點樣去壓沉把聲都試咗好多唔同嘅方法！」妹妹Annice（細Ann）亦說：「不過錄嗰陣好開心，因為監製會講好多鼓勵嘅說話，例如讚我沉咗把聲好似Beyonce（美國天后）咁性感！全程都冇鬧過我哋，所以過程好開心！」

食出腸胃炎

兩人由廣州來港生活，要互相照顧，問到如何分工？大Ann指她負責清潔工作，又說：「細Ann就負責整嘢食，不過佢嗰次煮完之後，我食到腸胃炎！」細Ann即作反擊：「我冇事呀，係佢身體差！」大Ann表示患過腸胃炎後，寧願選擇叫外賣也不敢再吃細Ann煮的食物！細Ann聞言亦不甘示弱：「我對佢都冇信心，佢上次整奇異果炒雞柳，我都淨係食粒奇異果！」雖然孖女你一言我一語互數，但兩人姊妹情深，不但可互補對方性格的不足，又可互相傾訴，傷心時更會相擁而哭！