陳敏之聞槍喪膽

陳敏之在新劇中罕有地飾演警察，卻原來她有童年陰影，很怕聽槍聲及巨響，當監製要求她開真槍上陣時嚇得狂哭，但總算衝破心理障礙。

陳敏之於新劇《法網狙擊》中飾演警員，雖然她渴望飾演警察，但今次真的大犧牲，事緣她有童年陰影，每逢聽到巨大響聲，例如紙炮，便會嚇得冒汗！

但拍到尾聲時，監製要求敏之開槍，她一拍完即嚇得狂哭，要同劇演員安撫！大家都為其勇氣鼓掌，敏之可謂衝破了30多年的心理障礙，她說：「今次我哋喺劇入面要開真槍，細個時表哥曾經喺我耳邊一個又一個氣球咁拮爆，之後我就好驚聽到呢啲啪啪聲。平時做司儀有響炮，表面上我好似笑，其實我好驚，甚至標晒汗。」

敏之於劇中面對的第二個難題，就是跟小朋友合作，不過今次較為順利，她笑說：「啲人成日嚇我，話同小朋友合作唔使旨意收工。不過我好好彩，遇着個『乖仔』，反而可以早收工。不過劇中個小朋友成日要喊，好慘，我第日一定唔會畀個仔做童星，因為實在太殘忍喇！」

為生BB結婚

坦言喜歡小朋友的敏之，很可能會為生BB而結婚。問到可有結婚計劃？她說：「都冇特別計劃，我同男朋友拍拖八年，最緊要身體好，咁就乜都得，但係自己心理上都要準備好先。（屋企人催你？）『家姐』伍詠薇同媽咪都冇催，不過佢哋都覺得差唔多喇！但因為我同男友感情穩定，結婚呢件事一定會發生，但順其自然，可能突然間都未定，但絕對不會鋪張。」