王祖藍情歌外洩

有讀者報料指網上瘋傳一首「無名氏」唱的廣東歌，網友估計主唱者是許廷鏗或王祖藍。記者聯絡祖藍所屬的英皇唱片公司，發言人證實歌曲是他未出街的新歌《奇幻逆緣》：「唔知點解會被人擺上網，既然咁好反應，公司決定提早於今日派台。」而唱片則於2月1日面世。

忙於拍戲的祖藍昨日受訪時哈哈大笑說：「把聲似許廷鏗都唔錯吖！好開心添！（新歌流出唔開心？）又唔會，可能係整定，咪順應天意囉！」他透露女友李亞男是其「幕後監製」，所有作品要經她「批准」才能出街，但抗拒邀對方拍MV：「有啲人接受我哋，但總有啲人唔鍾意，無謂強迫人哋睇我哋卿卿我我啦！」他自知搞笑形象深入民心，擔心歌迷不能接受他唱情歌。