基仔懶理冇獎拒蒲頭

古巨基和容祖兒前晚分頭出席平安夜倒數活動，基仔首度親證將會缺席四大頒獎禮，只因想放大假充電。

近日備受頒獎禮新聞困擾的古巨基，前晚現身平安夜倒數活動，親口承認不會出席頒獎禮：「我由1月1號起放一個月假，始終出席咗咁多年都覺得攰！希望趁呢段時間去旅行，兼見吓朋友同屋企人！」

儘管今年在事業上成績斐然，但基仔依然堅持休息：「既然決定咗休息，就唔會在乎得唔得到獎項！」亦不介意在勁歌頒獎禮奪得男歌手「五連冠」的機會「斷纜」，又否認因被電台打壓才放假。

親證為有型

原來另一個影響基仔缺席頒獎禮的原因，竟是死黨鄭伊健的一席話，基仔說：「佢話我今年咁好成績都唔去頒獎禮好有型，就好似畀佢打咗支強心針咁！」基仔曾表示可能於末日後結婚，問到是否好事近？他表明絕不會趁假期秘密「閃婚」。

另一方面，前晚容祖兒聯同羅力威和泳兒一同空降尖沙咀，出席海港城主辦的《容祖兒加大力度玩轉廣東道聖誕Street Party》。壓軸出場的祖兒一身七彩星星Look，坐星形吊臂出場，在半空中演唱，「着陸」後與Dancers勁歌熱舞。

對於基仔將缺席四大頒獎禮，祖兒說：「睇基仔自己意願啦！又冇明文規定一定要去，佢今年交出咗好好嘅功課，只係唔去畢業禮！」有指男友劉浩龍靠她帶挈，將在頒獎禮上得獎？她說：「我雖然有幸運兒嘅特點，但每人有得獎嘅實力！」並以「梗係正啦」來形容男友作品《爛命鴛鴦》。此外，被指打壓師妹林欣彤的她表示，這種無理指控很差，自己希望能幫新一輩的歌手。而被指在叱咤「我最喜愛的男歌手」五強中踢走基仔的羅力威表示，以基仔的實力和地位，不需要用獎項證明自己。