基仔拒攞音樂獎

古巨基今年推出的唱片和歌曲均獲各界好評，時近年底四張樂壇成績表派發在即，基仔竟懶理英皇反對，決定外遊放大假，缺席四台頒獎禮實行要假唔要獎。

古巨基去年便說過有感頒獎禮的意義已變質，曾要求不出席四台頒獎禮，但遭公司反對。然而，今年有傳電台高層甘菁菁為力撐陳奕迅（Eason）穩奪叱咤男歌手金獎，出招打壓基仔的歌曲播放率，令基仔再沒興趣參加所謂的樂壇頒獎禮。

據知基仔早在年初頒獎禮結束後已再向英皇重提不參加頒獎禮的意願，但英皇當時未有正面答覆，直至年中基仔便私下「Mark期」準備2013年1月1日開始放大假。早前基仔出席活動已露「唔玩」先兆，稱待「末日」過後才表態會否出席頒獎禮。不過，唱片公司認為基仔今年成績超卓，極有信心為基仔在頒獎禮爭取獎項，助他在無綫五奪「最受歡迎男歌星獎」及「金曲金獎」，甚至英皇行政總裁吳雨都認為有好成績，應該出席頒獎禮，但無奈基仔去意已決，令吳雨大為頭痛。

公司盡力爭取

昨日記者聯絡吳雨，他說：「基仔係有同我講要放假，但公司立場梗係想佢出席。（基仔被商台打壓？）傳聞嚟啫，基仔係辛苦先想放假。」可擔心影響與無綫關係？吳雨說：「唔會嘅，規矩個個台都有，基仔唔去咪分啲畀人囉，有能者居之。」另外，經理人霍汶希（Mani）則說：「佢係有咁嘅想法，我哋當然唔想，因為基仔今年喺各台成績都好好，我哋都想佢出席，始終佢係我哋公司中流砥柱。（傳電台打壓？）我諗呢啲係傳聞嚟啫！我哋最重要係尊重歌手決定，之前基仔同我哋講過如果冇末日就好想同屋企人出外旅行，因為多年嚟冇試過節日陪家人出去玩，但另一方面我哋都會盡最後努力爭取基仔出席頒獎禮。」