松岡衝破語言障礙

有「蜜桃胸」之稱的松岡李那（Linah），挾「日籍模特兒」的姿態躋身香港模特兒界，性格熱情開朗的她更深得廣告商歡心，密密接Job搵真銀。但原來在她剛來港時，連一句英語都不懂，就連最基本的「衣食住行」亦困難重重，難得她正能量爆燈，自學英語！

松岡李那膽粗粗來港發展模特兒事業，但英語及中文一竅不通，到餐廳食飯點菜都被問到口啞，雖然當時應付日常生活都有困難，但她卻堅持到底，並靠其「頑強意志」戰勝語言障礙。

回想當時的辛酸史，Linah立即收起平日的笑臉，一副「話當年」的模樣說：「我嗰時很Depressed（沮喪），勁唔開心o架！當時我淨係識最簡單嘅英語『一二三四』，日日去餐廳食飯都只可以食同樣嘅嘢，我連『Take Away』（外賣）都唔識講。但每當我一諗到自己仲未盡力就放棄，感覺似自己放棄自己咁，所以我很堅持要留喺香港，逼自己戰勝語言障礙！」

除「食」之外，「行」亦令Linah相當頭痛，經常搭錯車去錯工作地點，亦試過出席活動遲大到，不過她卻笑笑口表示當中亦有不少趣事：「嗰時我淨係識搭地鐵，連的士都搭唔到，因為我唔識話畀司機知目的地喺邊，我唯一識講嘅地方名就係我自己住邊度。有時我都會打返公司問路o架，不過個個都聽唔明我啲英語，成日將個電話一個傳一個，傳咗成間公司嘅人都冇人知我講咩，真係好搞笑！」

睇英文書自學

全因為不向現實低頭的堅持，Linah現在講得一口流利英語，絕對想不到兩年前的她是如何「靠自己」自學英語，就連她自己亦大呼當時的意志力驚人，她說：「我一直以嚟都冇上過任何英語班，每日放咗工我就返屋企睇英文書自學。最記得嗰時我晚晚都會諗定第二日想講啲咩，然後就查定字典，背定啲生字。同埋為咗快啲學好英文，我個腦就似熄咗個『日文Mode』嘅開關，淨係開『英語Mode』，所有嘢都用英語模式諗，依家都已經習慣晒啦！」

後記：交友奇遇

在松岡李那成功KO英語障礙前，她因工作而認識了一班好朋友，但她卻自爆他們一直都是以「雞同鴨講」來相處，她直言：「當時很難先識到一班好朋友，不過可惜佢哋全部都唔識日語，而我啲英語又差，有時急起上嚟佢哋叫我直接講日語，不過其實講完佢哋都係聽唔明，所以我都唔明點解我哋嘅友誼仲可以Keep到依家。」