祥仔：佢哋內地大把機會

《好報》爆料指出爐視帝黎耀祥得票與排第二位的馬國明只差三萬票；而賽前大熱林峯和徐子珊飲恨帝后，原來是成為高層角力的犧牲品，他們嬲爆計劃明年扭計唔拍劇。對此，祥仔不相信林峯和子珊反枱，認為他們在內地大把機會。

猛料如雲的《好報》爆料指因無綫高層樂易玲和曾勵珍角力，令賽前大熱的林峯和徐子珊最終失落視帝和視后，二人更向無綫反枱，明年罷拍劇！對此，視帝贏家黎耀祥昨日說：「點會呀？無綫唔係我哋控制嘅，係都攞啲股份先，咁就唔使拍劇喇！佢哋內地大把機會，唔會罷拍。（林峯粉絲唔滿意賽果？）呢樣嘢係必然，但我相信林峯冇佢啲Fans咁唔開心，阿峯做人踏實，都做咗呢行十幾年，明白遊戲規則，阿峯啲Fans反應亦正常。（下年你再攞咪變成公敵？）咁快講定，我都唔係個個角色都咁掂，其實今年都諗住恭喜阿峯，事實上觀眾係投票畀TVB，如果我過咗隔籬台可能都冇人睇。」他贊成公開票數，認為現在的爭議對無綫是侮辱及不公平。

有傳祥仔兒子黎正橋加入無綫，因而出現換獎傳聞，他說：「邏輯錯晒！如果係咁，應該係我畀番錢同獎TVB，完全係老作！唔反對個仔入娛樂圈，但係父子檔就唔喇！」他又主動澄清被雜誌指沾沾自喜粉絲多過林峯，他強調不會這樣說話。

楊怡繼續慶祝封后

得票緊隨祥仔之後的馬國明，獲悉二人只差三萬票，他說：「係咩？冇諗過有咁多票，多謝觀眾支持。」問到林峯票數三甲不入？他說：「吓？唔敢再講，怕惹是非！」他不相信續約有獎，並指自己與無綫還有長約。

至於視后楊怡昨日凌晨在微博上載與《名媛望族》台前幕後做冬飯聚的照片，順道慶祝楊怡封后，她留言表示飯聚已感心滿意足：「今晚能夠和你們相聚，我心滿意足了！」另外，兩位當事人林峯和子珊在截稿前仍未能聯絡上。