祖兒師兄前後腳避見

樂壇天后容祖兒跟劉浩龍（師兄）雖然公開戀情，但甚為避忌，前晚在頒獎禮玩前後腳！熱傳後日（21日）是世界末日，師兄坦言會攬住「Joey」度過，但此「Joey」不同彼祖兒！

祖兒前晚率英皇一眾歌手在《Yahoo!人氣大獎2012頒獎禮》橫掃19個獎項，祖兒憑《霧裡看花》奪得「人氣國語歌曲」、「本地女歌手」及「十年人氣大獎」三個大獎！祖兒男友師兄亦奪得「十大人氣歌曲」獎，自從「龍兒戀」曝光後，二人盡可能避免同場，前晚兩人亦刻意玩前後腳。

性感轉移視線

穿性感通花喱士裙的祖兒，否認為避男友而姍姍來遲：「我一早嚟咗！喺後台都冇見面。（要習慣成日碰面？）係你哋應該習慣吓，嚟緊我唔會點答喇！」並笑言靠性感轉移大家視線，亦為四大頒獎禮準備了性感戰衣，她說：「只有一套係由頭包到腳！」談到傳聞的世界末日將至，祖兒說：「末咩日吖，我啲工作排到出年！」她更希望在紅館倒數，計劃入紙申請。

師兄在早段攞完獎受訪後即撇，他解釋是公司安排，問到可擔心在其他頒獎禮上成被玩目標？他說：「順其自然。」將於後日到北京為新片開鏡的他笑說：「末日我會攬住側田同Joey Tang（鄧建明）過！」

同場的Twins奪得「本地音樂組合」及「十年人氣大獎」，蔡卓妍（阿Sa）還獲頒「亞洲最具號召力香港女藝人」，而鍾欣桐（阿嬌）則奪「人氣票后」，身體不適的阿Sa相當密實，不及穿透視露背裝的阿嬌有睇頭。