楊怡傻瓜謙隔空Kiss

楊怡前晚在台慶頒獎禮上喊住封后，緋聞男友羅仲謙亦眼濕濕，事後更在鏡頭前向楊怡送上飛吻！得悉謙仔「陪喊」後笑他是「傻瓜」的楊怡，離開電視城時大開香檳，臨走前更風騷派飛吻，與謙仔隔空呼應！

開齋封后的楊怡昨日凌晨時分離開電視城，與來自法國及新加坡等地的半百Fans開香檳慶祝，並識做地一一與他們合照，返家前更風騷地大派飛吻！昨日起床後，她先接受電台訪問，再到葵芳會合謝天華、梁烈唯及黃智雯等宣傳新劇，眾拍檔紛紛送上祝賀，天華更跪地送玫瑰並說：「你嫁畀佢啦！」嚇得楊怡反問：「邊個？」天華即抵死地說：「你嘅Mr. Right囉！佢份人好『謙』虛嘅！」玩遊戲時，天華又送上巨型支票給楊怡，並簽上「Mr. Law」，令她哭笑不得！

要求加人工

楊怡受訪時表示心情已平復：「因為今日要做嘢，所以尋晚冇餘興節目喇！（點慶祝？）遲啲要開劇，好想同媽咪去旅行，我得獎佢喊，今朝仲攬住我。（冇預羅仲謙份？）咁快？（佢喊喎！）有沙入眼啫！（做乜唔公開戀情？）兩回事喎！唔需要。（唔喺台上多謝佢？）我大把人排住隊要多謝，佢知o架喇！一步一步嚟啦！」事後冧爆地稱謙仔「傻瓜」的她，承認收到對方的短訊祝賀，相信稍後會約食飯：「我有打番畀佢，佢讚我好犀利。」至於有傳她與無綫加簽合約換獎，她說：「我張約都未完，如果要加就加人工先啦！」

而前晚楊怡封后一刻，電視機畫面拍得謙仔激動落淚，事後他接受電子傳媒訪問時，又大方當着鏡頭面前向楊怡送飛吻。謙仔昨日透過經理人公司回應：「我冇喊，只係眼濕濕啫！因為成晚氣氛都好感人，好似李成昌、古明華終於得到肯定，咁好朋友努力咗咁多年，終於有獎攞，梗係戥佢開心！（點同佢慶祝？）要為新片配音，又要還廣告債，嚟緊唔喺香港，或者返嚟約食飯囉！」至於飛吻一事，他笑言只是配合記者要求，並非採取主動。