蔡穎恩忍淚唱情歌

傷人者亦必自傷，揚言「我飛人多過人飛我」的模特兒蔡穎恩（Evelyn），近年決心轉戰樂壇，想不到最大的難關不是練出好歌喉，而是向自己的愛情故事挑機！回首昔日愛情路，Evelyn揚言付出多過收穫，幸有中學時代的一段豆芽戀，令諸多波折的愛情路上灑上一點甜味。

由模界轉戰樂壇的蔡穎恩（Evelyn）自幼已參加過無數歌唱比賽，對歌藝自然零負擔，但要唱出自己的故事甚有難度：「前排我試唱一首新歌嘅Demo，點知唱完已經眼濕濕，真係勁想喊，不過我知咁會好醜怪，所以叫自己忍住唔好喊，原來要唱番屬於自己嘅故事真係好辛苦！」說到昔日的愛情故事，Evelyn笑指自己在這個範疇的角色是「供應商」，專門負責滿足前男友各式各樣的需要：「我係一個供應商，以前男朋友想要咩，我就畀咩佢，三樣基本嘢一定做足，第一，煮飯煲湯唔少得；第二，講笑話氹佢開心；第三，留空間畀佢做私人事！」

二話不說撇

可惜最多的付出亦有盡頭，一個人能夠無私付出的同時，亦有能耐突然無情地收起所有關懷，Evelyn就是如此。她揚言每次分手，都是擔當狠心的「飛人者」角色：「講親分手，我通常都係飛人嗰個，因為每次感覺到大家性格唔啱，我就會當面講分開！」雖然表面夠狠，但Evelyn坦言主動攤牌的感覺極Hurt，而她只是強裝堅強：「有啲路一定要自己行落去，但我依家真係好驚拍拖！我唔想講番以前有幾Hurt，因為過去咗唔想再提……如果依家有人追我，我唔會再好似以前咁齋做供應商，我會等對方製造番甜蜜氹我，有人對自己好都唔錯吖！」

三年豆芽夢

雖然失戀傷人，Evelyn不諱言曾在愛情路上獲得過無數自製的浪漫及甜蜜，尤其是中學時期的三年暗戀生涯，更為Evelyn的生命注入動力！當年讓Evelyn神魂顛倒的是一名籃球健將，就算現在提及這段豆芽戀，Evelyn還是甜在心頭：「我另外有首新歌係講我暗戀嘅往事，中一嗰陣覺得有個師兄好靚仔，我就傻到諗盡辦法走去見佢，試過企喺窗邊望住佢打籃球，試過借頭借路走去佢班房借筆，又試過喺後樓梯撞到佢開心到面紅心跳。」更難得的是，Evelyn與昔日眼中的「情人」成為摯友，更不時與對方開玩笑：「唉！我咁就畀咗三年青春你喇！」難怪常言道，青葱歲月，永遠無憂無慮。

後記：忘記他

Evelyn在訪問中提及最近患上腦退化症的嫲嫲，笑言很羨慕對方經常忘記事情，皆因她想要「無痛失戀」：「如果可以好似嫲嫲咁，唔記得啲唔開心嘅事，淨係記得啲開心嘢，唔係好好咩？」世界豈能完美？說Evelyn天真無邪，實在不為過。

Profile

姓名：蔡穎恩

英文名：Evelyn

年齡：23歲

三圍：33B、25、35

入行經過：2009年闖入模特兒界的Evelyn，以清純外形見稱，同年即獲邀為東亞運動會負責傳遞火炬，近年積極籌備做歌手，進軍樂壇。