黃智雯未戰先輸

「關二嫂」黃智雯於今屆頒獎禮叫兩飛，憑劇集《缺宅男女》提名「最佳女配角」及「飛躍進步女藝員」，早前亦在馬來西亞ASTRO電視頒獎禮獲頒「我的最愛最具潛質女藝員」獎。智雯雖對角色有信心，但若在兩個獎項二選一的話，則認為奪「飛躍進步女藝員」機會較大，因她認為老友胡定欣在《拳王》表現出色，絕對有資格問鼎女配角獎，她不諱言亦睇好對方。

而去年已提名女飛躍獎的她，結果敗給馬賽，如今捲土重來，更以一個人見人憎的角色參賽，她說：「呢個角色同以往演過嘅好唔同，再唔係斯文乖乖女，到套劇出街係咁畀人鬧，話我做得好衰，起初會唔慣同唔開心，但諗深一層，即係代表觀眾有留意個角色啦！之後接受咗就冇事，仲愈畀人鬧愈開心。（咁想攞邊個獎？）總之有獎都開心啦！」