超雲山聰反常態潛水

昨日《好報》驚爆何超雲與陳山聰（山雲）戀情告急，指山聰借酒澆愁，更致電無綫高層樂易玲要求「復出」拍劇！過往二人即使傳鬧交都會高調澄清，但今次竟齊齊玩潛水！對於山聰復出，樂易玲不置可否，但承認山聰曾找她，令情變傳言甚囂塵上！

賭王何鴻燊三房長女何超雲與藝人陳山聰相戀兩年以來，因家底及背景懸殊，一直被外界指女尊男卑，但山聰卻懶理外界目光，繼續與賭王千金愛得癡纏！早前他們才慶祝拍拖兩周年，怎料最新一期《好報》爆出兩人情變，指原本疊埋心水轉型做時裝生意掌舵人的山聰，近日跟超雲吵大鑊，令他深受委屈及感到不受尊重，情緒極度低落，只好四出搵朋友吐苦水，借酒澆愁，更一度半夜致電無綫高層樂易玲：「我依家準備出嚟拍番劇，有冇問題？」隨時候命！至於超雲連日來亦孤身隻影，悶悶不樂，未見山聰陪伴左右，平日大方任影的她亦變得低調，發現記者時亦匆匆低頭避鏡頭。

過往即使被指感情亮紅燈，「山雲」都火速拖手出來澄清，不過今次卻齊齊玩「潛水」，令傳聞更似層層！本報昨日致電超雲，但電話接通後即轉駁到留言信箱，至於山聰的手機亦無人接聽，相當迷離！對於「山雲」傳出情變後，有指山聰復出拍劇？以及超雲為母親打理生意？本報記者昨日向三太陳婉珍求證，但她透過秘書表示不回應。

樂易玲：有探過我

另一邊廂，無綫高層樂易玲昨日接受本報電話訪問時，承認山聰曾致電給她：「我冇試過半夜收到佢嘅電話，佢哋兩個間唔中都會搵我傾吓偈，至於係咪鬧交我就唔知喇！東華（8日）嗰晚超雲入咗嚟，山聰都係WhatsApp我叫我照顧超雲，不過我唔喺香港幫唔到手。（山聰係咪返嚟拍劇？）佢係有返嚟探過我，但拍劇唔係咁就得，都要睇古仔傾劇本，等佢真係返嚟拍先講啦！」