黃智賢對「豬肉獎」平常心

無綫今年增設由無綫電視評委會選出的「傑出演員大獎」，此獎被外界視為「豬肉獎」，用作安撫無緣角逐大獎的演員，黃智賢及鍾嘉欣均是大熱人選。

無綫人才濟濟，但獎項只得寥寥數個，為免每年都順得哥情失嫂意，無綫今年增設「傑出演員大獎」，名額5個，全由無綫電視評委會選出，但候選資格、名單及準則不為外界所知，變成評委會「說了算」，極富「彈性」。

去年最佳男配角得主黃智賢（Ben），對於今年未能憑《雷霆掃毒》中「潘Sir」一角競逐「最佳男配角」，早已大發雷霆。對於無綫這個疑似「補飛」的傑出演員大獎，阿Ben雖然獲獎機會高唱入雲，但他卻顯得十分淡然，他說：「依家『傑出演員大獎』個名單都未出，我唔回應。其實公司到依家都未有人叫我出席頒獎禮，講到傑出，公司大把人好傑出，好多演員都好努力、有好好嘅表現，我對獎項抱平常心，我依家都仲喺學習階段，仍須努力！」

至於鍾嘉欣主演的《護花危情》雖是本年度收視最高劇集（截至截稿前），但她今年只能入圍「最佳女主角」，「我最喜愛的電視女角色」則名落孫山。為免只叫一飛的她最終冇獎而回，傑出演員大獎隨時是無綫對這位年度收視第一劇集女主角的最佳安排。

觀眾認同最緊要

嘉欣說：「我冇得角逐『我最喜愛的電視女角色』，我有失望，但好快忘記咗！獎項唔係最重要，觀眾認同先重要，我已經得到我最想要嘅嘢。（唔接受無綫呢個獎？）頒到畀我，我會開心咁攞。冇TVB就冇我，我會正面咁去諗，無論有乜獎，我都會開心接受，因為獎項唔只屬於自己，仲代表好多同事背後嘅努力！」