無綫向王維基宣戰Sure Win

無綫行政主席梁乃鵬上台致詞猶如誓師大會，力挺無綫招牌夠勁、製作出色外，還向王維基宣戰：「點解股東唔買有線、now、CTI（香港電視）？支持我哋，就要畀到佢哋有好回報，我字典裏面冇驚呢個字！王維基話TVB劇冇創意，但佢啲宣傳人員同好多員工都係嚟自TVB！」他又質疑王維基口響表示會製作大量電視節目，令人懷疑：「即係一日拍一集幾？點會做到，員工唔好信，最緊要有分析能力同邏輯！你就知道佢有冇料到！出年或打後，股東一樣會讚TVB，但其他公司可能第一次公布業績已經令人好勞氣，第二年就『MM聲』，之後可能祖宗都被人問候！」他又稱無綫不怕競爭，一定會贏，並嗌口號指無綫「永遠係龍頭大哥」！不過，梁乃鵬落台時險跌低，幸好有人攙扶，他表示去年已有食盆菜構思，問到是否花了很多錢？他說：「好少事，最緊要個個開心，想鼓勵大家士氣。（視帝視后投邊個？）我有心水，但唔方便講。」

對於被無綫指冇邏輯，王維基昨晚透過WhatsApp回覆：「來年有十隊攝製隊同時拍攝，每年650小時嘅目標係切實的，有實際營運經驗嘅人可了解，而我上星期日出席《城市論壇》討論免費電視問題，我認為無綫若有意見，何不出席一齊討論。」對於CTI股價方面，他則不作回應。據知香港電視方面對無綫搞千人盆菜宴反應冷淡，戥他們捱凍在停車場開餐很慘。