子珊接旨反發牌

無綫一連兩晚舉行全台員工晒冷晚宴圖穩定軍心，主席梁乃鵬更高呼向王維基的香港電視宣戰！今屆視后大熱徐子珊落足鞋油力挺無綫，認為政府再發免費電視牌照只會造成惡性競爭，又戴上綵帶風騷拉票爭視后，相反胡杏兒及陳豪則繼續贊成發牌！

電視台風雲鬧得熱烘烘，王維基的「香港電視」頻頻出招，無綫亞視則施計力阻政府再發免費電視牌，無綫昨晚破天荒舉行「TVB職藝員聯歡晚宴」，在將軍澳電視城停車場筵開179圍，行政主席梁乃鵬、高層樂易玲及李寶安率領共約2,000名職員食盆菜及大送禮物，出席藝員包括曾志偉、陳豪、黎耀祥、胡杏兒、徐子珊及苟芸慧等，而今晚亦會筵開153圍宴請約1,800名台前幕後，出席藝員則會有鄭嘉穎、郭羨妮及陳法拉等，據知兩晚共花費近一百萬元，非常落本！有指近日不少無綫小生花旦表示支持政府發牌，無綫昨日透過藝員部經理向旗下藝人發短訊，列出無綫的立場，外事部副總監曾醒明說：「公司透明度好高，純粹係溫馨提示，直接畀同事知道公司睇法。」

杏兒陳豪唱反調

未知是否提示有效，昨晚視后大熱子珊撐娘家，識撈的她認為再發牌只會有惡性競爭：「香港市場未必容納到！（怕少咗廣告？）都擔心，影響我哋收入，希望政府發牌更審慎！（有員工支持發牌！）大家唔同方法發表意見啫！」而黃智雯則表示對支持發牌與否沒有意見，認為良性競爭對觀眾、電視台及藝員是好事。杏兒雖力撐無綫遇強愈強，但與無綫唱反調竟支持發牌：「支持，不過內容交畀政府決定。（驚公司話你？）唔會！唔應該咁諗，應該要令自己團隊變得更強。」陳豪繼續支持發牌：「我以和為貴，有良性競爭係好事，希望成個環境更上一層樓！（支持發牌？）最緊要一視同仁，希望成個電視界再大啲，對各方面都好。」他又大讚梁乃鵬犀利，致辭聽到員工「慶合合」。

大聲公拉票爭視后

勁風騷的子珊出動大聲公及綵帶拉票爭視后，她笑言整道具不惜工本，自言似港姐及議員：「為咗拉票，低B啲都唔緊要！叫埋海外朋友投我，如果唔識投，畀身份證我搞都得！（厚面皮？）玩下啫！」她又笑言會向《雷霆掃毒》監製反映，將一秒輪姦戲炮製特別版冧網民。對於周潤發表示較睇好楊怡，子珊說：「我有睇片，佢唔係咁講，佢話唔喺香港先睇唔到我演出，希望佢上網睇番！」而有份爭女配角及飛躍獎的黃智雯則沒有積極拉票，她笑言為人低調：「想投我自然會投，好開心好多同事話投我！」而身在內地的林峯表示未收到無綫內部短訊，堅持撐政府發牌：「公司立場係啱，我講嘅係代表自己，贊成多個平台去做嘢，有競爭先有進步，令大家有動力做好啲，但呢樣嘢同政府發唔發牌係兩回事。」