圓處男紅館夢 6號@RB變喊包

出道8年的人氣樂隊RubberBand（RB）終於一償紅館夢，前晚在紅館舉行《RubberBand Easy Concert 2012》，唱足3粒鐘，吸引樂隊Mr.及小肥等捧場外，更邀得杜德偉（Alex）及容祖兒擔任嘉賓，Alex笑說：「多謝RB畀我再次感受少女嘅尖叫聲！」至於合唱《Slow & Easy》的祖兒，則大讚主音6號是好男人：「世上已經好少有咁專一嘅男人！」喊包6號用了10分鐘感謝工作人員，最後喊到流鼻涕！

慶功宴上，6號坦言壓力勁大，阿偉則自評80分，阿正亦搭嘴說：「我哋Handle到咁大嘅騷升咗呢！」有傳他們不續約金牌大風？泥鯭說：「我哋已經約滿，會小休兩星期諗清楚！（傳以300萬元留你哋？）錢會有影響，所有嘢交畀雷頌德傾。」而金牌大風昨日亦發聲明，指高層李文偉及朱浩棠已請辭，不會影響公司運作。