馮允謙10年內衝擊紅館

樂壇新人馮允謙（Jay）前晚舉行處男迷你音樂會，獲師姐鍾舒漫撐場。Jay直言以踏上紅館舞台為最終目標！而日前推出處男專輯的他，表示新碟除邀得恭碩良擔任監製外，更有機會與偶像方大同合作！

前晚Jay舉行《The First Showcase》，並與鍾舒漫（Sherman）合唱，而其新碟監製恭碩良（Jun）亦有現身。Jay表示之後想在九展等大型場地開騷：「但做歌手都想開紅館騷。（目標？）4至5年。（咁有信心？）咁10年啦！」提到公司另一新人羅力威可與大師姐容祖兒合唱，問到他可會覺公司偏心？他說：「冇諗，自覺幸運，加入公司冇幾耐，公司對我好好！」

新碟收錄自家作品

Jay自參加《超級巨聲3》後開始為人熟悉，其後獲英皇賞識收歸旗下。而剛推出首張個人專輯《今天開始》的他，亦懂得珍惜機會：「自己好期待同幸運，其實我由細到大都想做歌手，估唔到第一步咁快就夢想成真，好多謝咁多人幫我！」喜歡創作的Jay更感激Jun令新碟中有其作品：「第一次入Studio，佢知我有作歌，叫我畀佢聽吓，好好彩佢畀我用自己嘅歌！」Jun是他去年參賽時的評判，故曾令Jay生畏：「開頭都好驚，但希望可以令佢驕傲。佢好好人，亦係我嘅學習對象！」

Jay製作新碟最難忘的事是與方大同合作：「佢係我偶像，所以好幸運，個主意係Jun提出。佢識大同，所以造就咗呢次合作！」Jay更有機會與師姐鍾舒漫合唱：「開頭冇同過佢傾偈，以為佢好寸，但原來佢好好人，佢好鍾意音樂，仲聽好多外國歌手嘅歌！」鍾舒漫亦大讚Jay的聲音獨特，似外國專業歌手。