胡定欣樂做綠葉

胡定欣近日在馬來西亞ASTRO頒獎禮奪得女配角獎，大有機會於台慶頒獎再下一城奪「最佳女配角」，她坦言享受現時的位置，但亦恨攞獎。

藝員胡定欣近年與黎耀祥先後三次合作拍劇，近期她在《大太監》的演出可謂踏入成熟期，與祥仔也見默契，演技備受肯定，她說：「祥仔係好戲之人，同佢合作學到好多嘢，初期都好大壓力，依家好好多，但對自己要求亦高咗，今次拍得好舒服，因為古仔係講我哋曖昧情，唔需要攬攬錫錫，係含蓄嘅愛，以內心戲為主。」

唱片尾曲騷Quali

大家可能已遺忘定欣曾經參加新秀歌唱比賽，今次她與祥仔合唱片尾歌可謂水準之作，她說：「今次係好難得嘅機會，認識我嘅朋友同粉絲都知道我好鍾意唱歌，等咗呢日好耐，今次喺台慶劇唱半首歌都已經好開心。」

今年「無綫萬千星輝頒獎典禮」，定欣憑另一劇集《拳王》，成為提名「最佳女配角」的熱門人選，《大》劇正好為她拉票造勢，問到會否恨攞獎？她說：「其實恨o架！自己一直處於配角位置，但其實唔係一件壞事，自己幾享受做配角，當然想成為主角，但一步一步嚟。自己有信心，公司先會對你有信心。」