李璨琛發誓冇吸毒

徐淑敏丈夫黃浩聲稱有藝人在其開設的食肆集體吸毒事件愈鬧愈大！早前傳捲入事件的藝人李璨琛昨晚出席活動時直認當日有份出席飯局，並發誓絕對沒有吸毒：「我行得正企得正，要還我一個清白！」同樣被指捲入事件的潮人杜如風，昨日強調當時不在香港：「咁你都知件事可信性有幾高。」

黃浩聲稱的「藝人食肆吸毒」事件牽連甚廣，是非亦沒完沒了。早前傳捲入事件的藝人李璨琛昨晚出席活動時直認是傳聞中的飯局藝人，舉起三隻手指發誓絕對沒有吸毒：「我發誓！我冇做過嗰個老闆（意指黃浩）講嘅指控，我行得正企得正，真金不怕洪爐火，要還我一個清白，希望快啲水落石出！嗰晚有23個人一齊食飯，因為其中一個朋友生日，呢行真係愈講愈複雜！」他解釋事隔這麼久才開腔回應，是因為不想影響好友葉佩雯結婚：「事到如今，我覺得需要表態。」對於老婆Pee早前在Instagram留言鬧爆黃浩，李璨琛開腔力撐愛妻：「我點都企喺佢嗰邊，正常人（意指黃浩）都唔會報幾次警，拖埋記者勞師動眾，今年佢都唔知報咗幾多次警喇！」

代阿徐出頭

李璨琛指事件疑點重重，表示事發於去年1月15日，不明白若真的有人吸毒，為何當晚不立刻報警，又指所謂餐廳員工勒索事件令人費解：「話有人勒索又交唔到片，如果真嘅話，要有人協助調查。」並稱警方未有就事件聯絡他：「如果有，我就唔可以今日講呢件事啦！」對於好友徐濠縈被指與LMF成員阿傑親嘴，他激動地說：「有冇搞錯，低能！愈講愈離譜，無中生有！要咀一早就咀咗！」他強調阿徐與陳奕迅非如外間所指因黃浩是非而爭執：「佢哋識咗咁耐梗係冇問題！」又戥陳奕迅女兒康堤痛心：「連小朋友都唔放過，禍不及妻兒，去學校搵小朋友回應好傷（心）！」

杜如風呼冤

至於被指捲入飯局的杜如風，昨日接受電台訪問時強調當時不在香港：「我喺北京拍緊嘢，咁你都知件事可信性有幾高。」對於黃浩早前聲稱遭藝人恐嚇，杜如風贊成警方介入事件：「冇人恐嚇過佢，佢有片喺手點解唔澄清？佢報警我好開心，如果有片警方會搵片中人，但警方冇搵過我。」

消息稱，黃浩報警求助「疑雲」已非首次發生，去年黃浩與友人開設的餐廳與樂隊組合LMF成員因收費問題爭拗，其後有人在微博火爆留言指要找人到食店掃場，黃浩即與餐廳經理到灣仔警署報案，案件列作刑事恐嚇案處理，後來因證據不足終止調查。今次黃浩又自爆遭前員工以藝人集體吸毒短片勒索，雖然警方已聯絡他，但黃浩未能提供該前員工資料，警方未能採取進一步行動，已將兩事合併，列作罪案消息處理。