紅姑愛貓霸道識妒忌

鍾楚紅（紅姑）昨日出席連卡佛與施華洛世奇元素合辦的聖誕活動，穿低胸上衣的她大騷左胸兩個假蝴蝶Bling Bling紋身，相當搶眼。愛貓的紅姑提到家中所養的貓貓今年已12歲，問她可會準備新成員接力，她即眼泛淚光說：「唔好提，好驚。不過我隻貓好霸道，當咗我係佢個伴，佢會妒忌，接受唔到。我之前啲貓貓走時我好心痛，喊到眼腫面腫，要好耐先平復到。（會唔會唔養？）唔會唔養，養寵物係要經過呢個階段。」

她又表示最喜歡聖誕節，問到沒有伴的聖誕可會Lonely，她笑說：「我盡量唔諗，我有貓。」至於會否復出拍戲，她說：「研究吓，慢慢考慮吓，認真諗吓。（有人搵過你？）呢排冇，之前有，可能覺得我唔認真。（怕拍戲辛苦？）我唔怕辛苦，但我鍾意自由自在，拍戲係成個配套，成個生活畀晒佢。如果有合適都冇所謂，拍咗咁耐戲都鍾意演戲，始終有興趣，要睇時機。」