無綫臨陣吹雞撼城電

城電魔童王維基昨晚率領188名藝人包括黃日華、張可頤等舉行晒冷活動，卻遭無綫狙擊，臨時拉伕召集陳豪、黎耀祥及楊怡等60名藝人出席台慶活動硬撼，「贏陣輸勢」的城電惟有寸爆反擊！

無綫、亞視、城電（CTI）及nowTV為免費電視牌照之戰連月來連環出招，向來積極進取的城電，昨晚於尖沙咀某酒店舉行《一個電視台的誕生－新台命名．節目試映禮》活動，由「魔童」王維基率領黃日華、林嘉華、張可頤、鮑起靜、夏雨、廖啟智、廖碧兒、林文龍、劉美君、李璨琛、關楚耀、唐寧、梁小冰、楊淇及「外援」陳嘉桓等188名藝人大晒冷，並公布台名為「香港電視網絡有限公司」，但因大部分藝人知名度欠奉，只能說贏陣輸勢，故無綫即使「臨時拉伕」找來60名藝人出席《萬千星輝頒獎典禮2012》全民投票活動，仍贏足幾條街，不少一線小生花旦包括謝天華、郭晉安、楊怡、胡杏兒、黎耀祥及陳豪等均抽空撐場，再加上羅仲謙、張兆輝及人氣急升的梁烈唯及古明華等，城電可謂望塵莫及。

無綫助理總經理區偉林上台致辭時強調拉票活動籌備時間緊迫，並向藝員耍冧：「要同啲藝員講唔好意思，當通知又好，威逼又好，咁短時間發通告要大家出席。」對於疑似有意硬撼城電，他表示是因早前在馬來西亞的電視頒獎禮中獲取佳績，才決定搞大型活動慶祝：「唔存在對撼或晒冷，尋日喺機場嘅慶功好細規模。」　

黃日華「暴食」爭取發牌

而城電昨晚活動除了一味夠人多，亦充滿火藥味，黃日華、王維基、張可頤及余慕蓮等先後「寸」爆無綫！黃日華表演棟篤笑時揚言若政府再不發電視牌照，他會去政府總部暴飲暴食以示抗議：「革命係需要犧牲嘅，就算少咗我一個，後台仲有幾百人撐佢！」而除了有三位舞者於台上戴上王維基面具又跳又耍劍，大搞氣氛外，真身王維基亦大玩感人爆辛酸史搶焦點：「呢條路（搞電視）真係好唔自在，1068日每步都好艱辛，呢種辛酸同壓力不為外人道。我喺商場廿幾年，冇諗過每日要面對瘋狂鬧劇。」他又自稱贏盡民意：「我問心無愧……好唔忿氣，點解香港優勢愈嚟愈少？所以我要發揚電視業！有人話我要嘅人都係嚟自同一個機構（無綫），係呀！如果唔係人哋都唔會咁鬧我，佢哋以前喺動物園，依家喺大森林，以前係踱步，依家係奔跑。我嘅八字真言係『創意無限　製作認真』！」而昨晚現場播出十多套劇集宣傳片，內容略嫌血腥及色情，其中劉浩龍與男演員有咀戲，廖碧兒則伸脷Lam蘇永康。

張可頤讚工作舒適

王維基事後受訪，談及無綫就其晒冷活動有「相應行動」，他笑說：「好事！有競爭先有進步。（無綫追住嚟打？）呢行需要刺激。」他又指希望明年3月能獲發牌照，並表示從未聽過有員工有回巢無綫之意，而亞視高層盛品儒早前質疑他盜取亞視機密，王維基說：「我唔會再對瘋狂鬧劇作出批評，佢講任何嘢我都唔會再評論！」而城電一姐張可頤亦未曾聽聞有城電員工欲返無綫：「我暫時好享受依家工作環境，每日有8小時休息瞓覺，題材又大膽。」她指無綫暫時未有找她，笑謂不會學黃日華暴飲暴食，但盛讚對方有正能量。