RubberBand開騷搵靚女

樂隊RubberBand出道四年，終嘗紅館開騷滋味，「港版Psy」做監製外更跳舞助興。四子表示已請來神秘女嘉賓，成員阿偉更笑說：「有肥Wil（錢國偉）點會冇靚女！」

樂隊RubberBand出道四年，終於「升呢」上紅館開騷！昨日，他們為《RubberBand Easy Concert演唱會2012》進行綵排，更請來人氣熱爆的「港版Psy」錢國偉（Wilson）擔任監製，四子當然不容有失！

杜德偉自薦做嘉賓

問到綵排進度，泥鯭表示非常順利，正步入背流程的階段。豈料最冇記性的原來就是泥鯭！在旁的阿偉笑說：「有啲人記性特別差囉！」阿正亦笑說：「啲人連叫我起身都唔記得呀！」慘被成員嘲諷的泥鯭也不忘自嘲：「係呀！我依家係七、八十歲嘅老人家記憶力咋！」

談到演唱會嘉賓，四子大賣關子，只透露屆時會有一男一女，阿偉說：「有肥Wil嘅地方點會冇女人吖！所以我哋有個女性神秘嘉賓。」泥鯭透露男嘉賓是新婚的杜德偉（Alex）：「我哋之前翻唱過Alex嘅一首歌，佢聽完都話好，仲主動搵上門做嘉賓添！」問到嘉賓皆是「重量級人馬」，他們會否承受很大壓力？阿偉說：「翻唱版本冇咁好，到時演唱會就一定唱得好啲！」