楊怡聞催婚嗌頭暈

楊怡與羅仲謙在馬來西亞的頒獎禮上雙雙得獎，當他在台上公開「愛的宣言」時全場起哄！林峯公然向兩人催婚，謙仔雖暗示恨娶，但楊怡聞婚卻嗌頭暈。

藝人楊怡前晚在馬國舉行的《我的最愛頒獎典禮ASTRO ON DEMAND AWARDS 2012》中，勇奪「我的最愛電視女主角」，緋聞男友羅仲謙亦獲頒「我的最愛電視男配角」。羅仲謙上台領獎時公開多謝楊怡，令台下的女友亦大為激動，在旁的林峯讚Sweet爆更公然催婚！昨日，一班得獎者返港出席祝捷會，對於公開「多謝楊怡」一事，謙仔說：「男仔要大方啲，拍劇佢幫咗我好多。（被催婚？）講吓笑啫！（佢冇多謝你嘅？）多謝朋友、無綫已經足夠。（拎視帝就求婚？）婚姻隨緣！（佢係結婚對象？）好女仔係男仔都想，唔知有冇咁好福氣。」他坦言希望有朝一日可以坐上視帝寶座，可與楊怡拉近距離。

相反，在台上講感受時眼濕濕的楊怡一直沒有公開致謝謙仔，她說：「因為冇咩要多謝佢，諗唔到！」對於謙仔表示拍劇期間得到很重要「嘅嘢」，她說：「我唔知喎！我係人唔係『嘢』喎！我都戥佢開心。（催婚？）頭暈！依家興聽到緋聞就起哄，聽完開心就繼續工作。」至於如何報答投她票的粉絲，楊怡說：「送羅仲謙出去！（送佢裸照？）我哋冇裸照o架！」

馬國明黐胡定欣

前晚頒獎禮完結後，無綫高層區偉林筵開五席慶祝，早前傳法國拍劇時翻撻的「我的最愛電視男主角」馬國明與「我的最愛電視女配角」胡定欣不避嫌並肩而坐。胡定欣坦言戥馬國明開心，支持他再奪台慶頒獎禮的「視帝」。馬國明則表示沒有因而增加台慶頒獎禮的獲獎信心，笑言要在討論區開戶口拉票，投他票的粉絲可獲岑麗香或苟芸慧靚相。