祖兒夾萬嘴撬唔開

自「龍兒戀」公開後，容祖兒和劉浩龍一直愛得甜蜜。昨日他們分別出席活動，心情靚爆的祖兒有問必答。相反，師兄三緘其口，收起昔日的寸嘴態度！

容祖兒和Twins昨日到大埔出席慈善活動，日前阿嬌被踢爆和韓國人K先生蜜運半年，祖兒表示一早知情：「我知佢秘密拍拖，但仲未見過佢男友。（阿嬌叫你守秘密？）我不嬲都唔係口疏嘅人，唔想畀人話我係『筲箕口』，Mani（經理人霍汶希）先最筲箕呀！我份人好真心，你同我講秘密，一定唔會講出去，但你要同我講聲係秘密囉！」三姊妹現時都名花有主，當提議她和阿Sa可帶埋另一半，與阿嬌及「泡菜男」三對情侶一同行山，祖兒即風騷地說：「帶泡菜去野餐？好少人咁做喎！」

泡菜鍋女友冇份

至於祖兒男友劉浩龍昨午在銅鑼灣出席活動，一向被質疑黐祖兒博上位的他，被問到有關女友的問題時顯得頗為避忌。由於舞台對面掛有祖兒的巨型廣告牌，問師兄是否望住「靚嘢」唱歌？他即滿面通紅地說：「傻傻哋嘅。」提到他日前親自下廚煮泡菜鍋冧女友，他否認：「我鍾意食韓國嘢，煮畀自己食啫！（祖兒冇份？）煮咗畀媽咪同細妹食。」對於祖兒曾說煮餐飯要搞成日，師兄開始三緘其口：「對唔住唔講呢啲嘢！（同阿嬌阿Sa三對情侶一齊行山？）都唔講呢啲！」

另外，祖兒前晚在《2012勁歌金曲優秀選第三回》成大贏家，分別奪金曲獎、「最受歡迎廣告歌曲獎」和「最受歡迎華語歌曲獎」，而阿Sa和古巨基等亦有份奪金曲獎。