洪杰遊羅馬買名牌袋冧阿媽
英皇歌手洪杰早前遠卦意大利拍攝微電影，初次歐遊的他戴黑超、Gel頭四出拍照，更在名勝前扮嘢留影，實行Chok爆羅馬！他說：「細個對羅馬嘅印象只能局限喺電視、報紙，當親身去到時覺得好宏偉，但係有啲後巷街道有少少似澳門！」廿四孝的他更不忘買名牌手袋贈媽咪：「歐洲買名牌真係平過香港好多，我買咗個五位數嘅手袋畀媽咪做手信。」
洪杰希望有機會攜父母再到歐洲旅行，問到有否偕舊愛出埠？他稱曾「孖公仔」自駕遊：「之前喺美國讀書，有揸車帶佢周圍去，因為女友係台灣人，仲同佢去過台灣玩！」洪杰又指現階段最想到日本旅行：「咁大個仔都未去過日本，我唔怕輻射！」
洪杰赴意大利拍微電影，趁空檔四周遊覽，寓工作於娛樂。
洪杰Gel行頭兼以Chok樣自拍。
洪杰與卡通公仔搞鬼合照。