葛民輝教仔「播種」

葛民輝昨日出席活動時笑言兒子不愛影相愛女人，自嘲變態老竇之餘，更口出狂言：「離離合合嘥時間！」教兒子不要拍拖，並笑言「搞大人個肚就夠！」

藝人葛民輝昨日出席《Canon Imagine Nation數碼博覽會》，身為攝影達人的阿葛表示，成為代言人後收到很多電子產品禮物，問到兒子有否遺傳他對攝影的熱愛？他笑說：「佢唔係咁鍾意玩影相，佢應該想玩女人多啲！不過佢冇錢玩！（阿仔有冇拍拖？）佢依家所有秘密都唔同我講，佢老竇咁變態，佢覺得丟架，唔認我！」

拍拖嘥時間

對於拍拖，阿葛有其一套獨特的教仔方法：「佢阿媽好嚴，可能唔畀佢拍拖，不過我覺得離離合合嘥時間！唔好拍住，搞大人個肚先！置之死地而後生！到時可能好多人認佢做老公，我就有啲肯尼亞、非洲嘅新抱！（阿仔幾多歲？）合法年齡！我淨係知佢要畀學費！」當記者讚他Keep得好時，他打趣說：「因為我好後生嗰陣搞o架！」