蔣家旻演妓升呢

無綫小花蔣家旻（Angel）在新劇中豁出去演京城名妓，不乏內斂感情戲及只穿肚兜的性感場口，更要主動色誘攬啜曹永廉，極有發揮空間！Angel望憑此升呢，不用再局限演妹妹角色！

現年22歲無綫小花蔣家旻多演學生妹或主角的阿妹，最近在劇集《大太監》中終有所突破，飾演歷盡滄桑的妓女，更要色誘太監曹永廉，挑戰甚大，她直言收到劇本後非常緊張：「我有問監製點解搵我，原來係想要個外表好純但其實思想複雜嘅女仔，我事前睇好多參考資料，諗咗好多方法演！」

谷胸演出冇所謂

太監與妓女，兩種社會上最卑微人物的愛情故事，令Angel十分感動，一場與阿廉的重逢戲，更令她難忘至今：「我同佢一路傾一路喊，劇本寫明我滴眼淚要滴落碗雲吞麵度，我真係畀佢感動到，結果一Take過完成！」看來Angel的演技又有所進步！

演妓女自然不乏性感鏡頭，其中一幕Angel穿上肚兜露香肩親近阿廉，令人充滿遐想，她說：「不過鏡頭前有層薄紗，我覺得仲浪漫。（再性感啲？）最多咪拍唐朝戲要谷胸，大家都咁谷，我冇所謂o架！」她表示第一場戲便要色誘阿廉，要主動親吻及撫摸對方，難免尷尬：「我有搵阿廉研究點演，佢叫我放膽啲，好在我角色係名妓，唔使好姣！」

問到是否想憑此角成為宅男女神？Angel謙稱不敢當，只想給監製及觀眾看到另一個她，不用再局限於妹妹角色：「我覺得宅男唔鍾意我，佢哋鍾意個樣好精緻或者好可愛，我都唔係，只想大家睇到我演技。（攞飛躍獎？）有提名已經好夠，我要拍多啲好作品儲經驗！」