阿Sa攞水淋醒伊健

蔡卓妍（阿Sa）與鄭伊健再在大銀幕上雙劍合璧，默契依然！阿Sa盡情發揮野蠻人妻本色，「欺凌」伊健日沖4次涼，反獲伊健「以德報怨」，他更膽生毛稱未婚妻蒙嘉慧是「典型港女」！

阿Sa與伊健10年前合拍攝阮世生電影《我老婆唔夠秤》，贏盡口碑及票房，基於情意結，阮導嘔心瀝血安排二人「再續前緣」，主演新片《我老婆唔夠秤2我老公唔生性》。電影順利完成，下月上映，男女主角伊健與阿Sa直言未感壓力：「我哋Enjoy個過程，做好啲戲已經盡咗責任，不過由於10年前上集冇進軍過內地市場，今次能夠喺內地上映，心情的確係有啲期待嘅。」

爆拍檔「食防腐劑」

這對活寶貝日前雙雙接受訪問，期間不忘互笠高帽，女的讚男的「食咗防腐劑」，樣子十年如一日，男的則指女的經常送贈「驚喜」。談到今次繼續扮演野蠻人妻，並自創橋段「欺凌」伊健，阿Sa搞笑地說：「佢瞓瞓吓覺畀我用水照頭淋囉！加埋NG佢最高紀錄試過一日沖4次涼。」問到現實生活中會否同樣對待男友陳偉霆施以「酷刑」？阿Sa靦腆不語，在旁的伊健見狀即代阿Sa解圍：「行為上就唔知，但肯定佢心底係錫對方嘅。」

阿Sa戲中名字叫YoYo，剛巧伊健現實生活中亦有一位「重要YoYo」－－未婚妻蒙嘉慧。問到拍戲叫起「YoYo」時是否特別親切？伊健說：「又唔會喎！（女友同阿Sa一樣咁野蠻？）一時時啦，佢係典型港女。（你咁大膽？）話人港女都唔係貶詞啫！其實香港女仔不知幾有性格又自立，呢樣都係香港文化嘅一種。」再追問婚期時，伊健大笑卻三緘其口，口硬不肯透露端倪。