千嬅儲獎威畀個仔睇

產後鮮有出席活動的楊千嬅，為賀林夕奪音樂成就大獎，前晚在會展出席CASH頒獎禮時首開金口，已儲齊一系列歌手獎的她笑言今年未必會出席頒獎禮。同場的王菀之得知自己可能是最後一屆亞太女歌手時，即自誇威水！

楊千嬅、王菀之（Ivana）、陳豪及黃德斌等，前晚於灣仔會展出席《2012 CASH周年晚宴暨金帆音樂獎頒獎典禮》，填詞人林夕獲頒音樂成就大獎，穿黑色高貴晚裝的千嬅壓軸演唱其作品，明顯瘦了一圈的她嫌自己仍未回復Fit爆身形：「要再減呀！費事畀人話我又有喜！」今次是千嬅產後首次在港獻唱，問到唱歌可會不夠氣，她說：「頭3個月都有啲，做番運動Keep Fit就好啲！」對於有傳今屆勁歌頒獎禮取消亞太歌手獎，曾奪一屆亞太女歌手的千嬅說：「其實獎項呢啲好彈性。（可能取消埋勁歌？）換個模式啫！合辦嘅話公信力大啲，完全冇就唔好，始終代表香港文化，我做新人嗰時都恨上台攞獎！」現在有子萬事足的她笑說：「今年可唔可以唔去o架？都儲齊咗套Collection歌手獎畀個仔睇啦！」

至於染了一頭金髮的Ivana以全白長裙造型獻唱，提到她可能是最後一個奪亞太女歌手獎的歌手時，她即笑到見牙唔見眼：「我好威呀！包個靚尾拎個尾彩，好意頭！」問到可會想四台合辦頒獎禮，她似心大心細的說：「多啲好啲嘅！每個頒獎禮有唔同感情同性質，想像唔到統一會點。（統一唔使準備咁多戰衣？）係喎！外國都係統一一個，可以諗吓！」

陳豪聞茵面紅

同場的陳豪和黃德斌憑《年少無知》一曲奪得最佳合唱演繹獎，「鼓佬」林保怡因身在內地拍劇而缺席，德斌笑言第二次憑此歌奪獎但仍很激動，又踢爆陳豪好唱口。提到女友陳茵媺想聽他唱聖誕歌，陳豪即面紅說：「佢想聽咩咪唱咩囉！」而他昨日出席傢俬活動時被提議開賠率，賭其奪視帝的機會，他即拒絕：「開太低人哋唔投我一票！（叫女友Fans幫手？）唔好搞到人哋啦！有人投我請佢飲咖啡啦！」